خرجت سنيه وسعديه للتضبع فى منطقه وسط البلد
وشراء بعض مستلزمات البيت
وكعاده القاهره طبعا زحمه وشافت سعديه جاراتها الست كفايه
وهنا
سنيه: ايه ياسعديه مش دى الوليه كفايه
سعديه: بصيت وتمحصت وقالتها تصدقى هى
سنيه: كفايه ياكفايه
وسعديه انضمت ليها ونادت : وهى بتنادى وتقول كفايه كفايه
وهنا لقيوا ضابط امن مركزى من اللى بيفهموا دول واللى بينقوهم على الفرازه
حاجه طول وعرض مسكهم وقذف بيهم فى عربيه ترحيلات
ولاسنيه ولاسعديه فاهمين ايه اللى حصل
وفى القسم بدات التحقيقات
الضابط: ايه علاقتكم بحركه كفايه؟
سعديه: ايه يابيه هى كفايه عملت حركه
سنيه: شوفتى الوليه كنا فكرنها محترمه صحيح هى لسانها طويله بس مش بتاعت حركات
الضابط: انتوا بتستهبلوا انتم اعضاء فى حركه كفايه
تعرفوها من امتى
سعديه: من زمان دى جاراتنا من زمان
هنا نادى الضابط على العسكرى وهو بيقولهم طيب انا هاعرفكم تستاهبلوا ازاى خليهم يوضبوهم
يادوب دخلوا سعديه وسنيه
وهاتك ياضرب من نسوان الحجز
وصرخت سعديه وهى بتقول الله يخربتك ياكفايه الهى يابعيده اشوف فيك يوم
وهى بيقولهم ايه الاخبار؟
ردت سعديه والله يابيه احنا مانعرف غير الوليه كفايه دى ست عنست اذا كانت الحكومه منعت اننا نكلم المعنسين بلاها كلامهم
ولوعايزنا نعزل من المنطقه نعزل
الضابط: انت موجه ليكم تهمه تكدير الامن والمشاركه فى مظاهره
سنيه: تكدير مين ،ومظاهرات ايه، يانهار اسود ومنيل احنا مالناش دعوه بمظاهرت احنا ماشين جنب الحيط،ده احنا كنا رايحين نشترى لبس وشويه طلبات وشوفنا جاراتنا كفايه ونادينها
هنا حس الضابط ان فيه حاجه غلط:
وشويه وجه زوج كل من سنيه وسعديه واستلموا زوجاتهم
يادوب وصلت سعديه وسنيه البيت وبدات بنتها ليلى تقولها حصل إيه ياماما قالتلها احنا روحنا نشترى الطلبات كانت فى شويه ناس واقفه ومش اهتمينا بيهم
ويدوبك لمحنا جاراتنا كفايه
هنا صرخت سنيه وهى بتقول ماتقوليش الاسم ده
والله لونطقتيه مش هاعرفك تانى
قالتلها سعديه ويدوبك نادينها وعنيكى مايشوف الاالنور وهما مصمين اننا اعضاء حركه كفايه واحنا نقولهم والله احنا بتوع الست كفايه
اه يافايه
ردت ليلى تقصدى كفايه
قالتهل لا
افايه
ضحكت ليلى
بقيت عضو معارض فى مجتمع
ردت سنيه معارضه ايه ونيله إيه هوانا وامك عارفين حاجه احنا بنمشى جنب الحيط
ردت ليلى اه وطبعا ماشين بمبدا الباب اللى يجيلك من الريح سده واستريح
وياداخل بين البصله ومجموعه عشان مانعلى ونعلى ونعلى لازم نطاطى نطاطى نطاطى!
هنا وسمعت سنيه وسعديه
حد فى الحاره وهو بينادى ويقول
ياكفايه ياكفايه .........كفايه
صرخوا الاتنين وقالوا
احنا مالناش دعوه سدى الابواب قفلى الشبابيك
اهه يافانه يافانه
الى اللقاء فى الحلقات القادمه من "يوميات سنيه وسعديه"
02 نوفمبر, 2008 01:58 ص